Lo jutge central de vigilància penitenciària de l’Audiéncia Espanhòla, José Luis Castro, acceptèt dijòus passat la demanda de metre en libertat, per de “rasons umanitàrias”, lo presonièr Josu Uribetxeberria Bolinaga après l’aver vesitat a l’Espital Donostia de Sant Sebastian (Bascoat). La sortida de la preson serà pas immediata perque caldrà esperar las proceduras formalas e que se presenten pas de recorses contra.

La decision, lo jutge l’a presa contra la recomandacion del rapòrt de la clinica legista de l’Audiéncia Espanhòla sus l’estat de santat de Iosu Uribetxeberria, que conclusiá que lo presonièr basc pòt èsser sonhat del càncer terminal dins la preson e que lo cal quitament pas portar a l’espital. L’estudi medical foguèt liurat fa una setmana al jutge central de vigilància penitenciària, José Luis Castro, e al procuraire Pedro Rubira, que pren la plaça del procuraire en cap Javier Zaragoza. Lo rapòrt contradisiá aquel de l’Espital Donostia de Sant Sebastian.
 
Fa doas setmanas, lo secretariat general espanhòl de las Institucions Penitenciàrias concediguèt lo tresen gra a Uribetxeberria, après lo rapòrt de l’espital de Sant Sebastian, que constatava que lo presonièr patís un càncer terminal e irreversible e que i a 90% de probabilitat que morisca abans un an. Aquela corta esperança de vida li dona drech a l’excarceracion en tot superar, de manièra fòrça neta e frapanta, los paramètres fixats pel govèrn espanhòl en 2000.
 
La concession del tresen gra, qu’obliga lo presonièr d’anar dormir dins la preson, èra lo passatge prèvi a la decision de libertat condicionala.